ಭಾರತ-ಆಸ್ಟ್ರೇಲಿಯಾ ಮೊದಲ ಏಕದಿನ ಪಂದ್ಯ: ಟೀಂ ಇಂಡಿಯಾಗೆ ಸೋಲು

ಸಿಡ್ನಿ: ಭಾರತ ವಸರ್ಸ್​ ಆಸ್ಟ್ರೇಲಿಯಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಗೆಲುವು ಸಾಧಿಸಿದ್ದು, ಟಾಸ್​​ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಆಸ್ಟ್ರೇಲಿಯಾ ತಂಡ 50 ಓವರ್​ಗೆ ಆರು ವಿಕೆಟ್​ ನಷ್ಟಕ್ಕೆ 374 ರನ್‌ಗಳಿಸಿ ಟೀಂ ಇಂಡಿಯಾಗೆ ಬೃಹತ್ ಗುರಿಯನ್ನು ಮುಂದಿಟ್ಟಿತು. ಇದನ್ನು ಬೆನ್ನಟ್ಟಿದ ಭಾರತ ತಂಡ 50 ಓವರ್​ಗೆ 8 ವಿಕೆಟ್​ ಕಳೆದುಕೊಂಡು 308 ರನ್ ಗಳಿಗೆ ತನ್ನ ಆಟವನ್ನು ಮುಗಿಸಿತು.

ಆಸ್ಟ್ರೇಲಿಯಾ ತಂಡದ ಪರ ಡೇವಿಡ್​ ವಾರ್ನರ್ ಹಾಗೂ ಫಿಂಚ್ ಜೋಡಿ ಮೊದಲ ವಿಕೆಟ್‌ ನಷ್ಟಕ್ಕೆ 156 ರನ್‌ಗಳ ಬೃಹತ್ ಮೊತ್ತವನ್ನು ಕಲೆಹಾಕಿತ್ತು. ವಾರ್ನರ್ (69) ಗಳಿಸಿ ವಿಕೆಟ್ ಒಪ್ಪಿಸಿದ ನಂತರ ನಾಯಕ ಆರೋನ್​ ಫಿಂಚ್‌ಗೆ ಸ್ಟೀವ್​ ಸ್ಮಿತ್ ಜೊತೆಯಾದರು. ಈ ಇಬ್ಬರು ಕೂಡ ಶತಕದ ಜೊತೆಯಾಟ ಮಾತ್ರವಲ್ಲದೇ ಇಬ್ಬರೂ ಸೆಂಚುರಿ ಬಾರಿಸಿದರು. ಫಿಂಚ್(114) ಗಳಿಸಿದರೆ ಸ್ಮಿತ್ (105) ಗಳಿಸಿದರು. ಆಲ್​ರೌಂಡರ್​ ಮ್ಯಾಕ್ಸ್‌ವೆಲ್ ಕೇವಲ 19 ಎಸೆತಗಳನ್ನು ಎದುರಿಸಿ 45 ರನ್​ ಸೇರಿಸಿ ಬೃಹತ್ ಮೊತ್ತಕ್ಕೆ ಉತ್ತಮ ಕೊಡುಗೆ ನೀಡಿದರು.

ಈ ಮೊತ್ತವನ್ನು ಟೀಮ್ ಇಂಡಿಯಾ ಬೆನ್ನಟ್ಟಲು ಆರಂಭಿಸಿತು. ಮೊದಲ ವಿಕೆಟ್‌ಗೆ ಅರ್ಧ ಶತಕದ ಜೊತೆಯಾಟವನ್ನು ನೀಡಿದ ಆರಂಭಿಕ ಬ್ಯಾಟ್ಸ್​​ಮನ್​ಗಳಾದ​ ಮಯಾಂಕ್-ಧವನ್ ಜೋಡಿ ಇನ್ನೇನು ಉತ್ತಮವಾಗಿ ಪಂದ್ಯ ಸಾಗುತ್ತಿರುವಾಗಲೇ ಮಯಾಂಕ್​ ಅವರ ವಿಕೆಟ್​ ಪತನವಾಯಿತು.

ಮಯಾಂಕ್ ಅಗರ್ವಾಲ್ (22) ಗಳಿಸಿ ಔಟಾದ ಬಳಿಕ ಬಂದ ನಾಯಕ ವಿರಾಟ್ ಕೊಹ್ಲಿ (21) ಗಳಿಸಿ ಬೇಗ ವಿಕೆಟ್ ಒಪ್ಪಿಸಿ ಮೈದಾನದಿಂದ ಹೊರನಡೆದರು​. ಶ್ರೇಯಸ್ ಅಯ್ಯರ್ ಬಂದ ಹಾಗೆಯೇ ಫೆವಿಲಿಯನ್​ನತ್ತ ಮುಖಮಾಡಿದರು. ಕೆ.ಎಲ್. ರಾಹುಲ್ ಕೂಡ ಕೇವಲ (12) ರನ್‌ಗಳಿಗೆ ತಮ್ಮ ಆಟ ಮುಗಿಸಿದರು.

ಈ ನಡುವೆ ಹಾರ್ದಿಕ್ ಪಾಂಡ್ಯ ಆರಂಭಿಕ ಆಟಗಾರ ಧವನ್‌ಗೆ ಜೊತೆಯಾದರು. ಈ ಜೋಡಿ ಅದ್ಭುತವಾಗಿ ಇನ್ನಿಂಗ್ಸ್ ಕಟ್ಟಲು ಮುಂದಾದರು. ಈ ಜೋಡಿಯ ಆಟದಿಂದ ಭಾರತಕ್ಕೆ ಗೆಲುವು ತಂದುಕೊಡಬಹುದು ಎಂಬ ಕನಸಿತ್ತು. 128 ರನ್‌ಗಳ ಜೊತೆಯಾಟ ಆಡಿದ ಈ ಜೋಡಿ 74 ರನ್‌ಗಳಿಸಿದ್ದಾಗ ಶಿಖರ್​ ಧವನ್ ವಿಕೆಟ್ ಉರುಳಿತು.

ಹಾರ್ದಿಕ್ ಪಾಂಡ್ಯಗೆ ಜಡೇಜಾ ಜೊತೆಯಾದರು. ಆದರೆ, ಈ ಹಂತದಲ್ಲಿ ಪಾಂಡ್ಯ 90 ರನ್ ಗಳಿಸಿ ದೊಡ್ಡ ಹೊಡೆತಕ್ಕೆ ಪ್ರಯತ್ನಿಸಿ ತಮ್ಮ ವಿಕೆಟ್ ಒಪ್ಪಿಸಿದರು. ಅಲ್ಲಿಗೆ ಭಾರತದ ಗೆಲುವಿನ ಕನಸು ಭಗ್ನವಾಯಿತು. ಅಂತಿಮವಾಗಿ ನಿಗದಿತ 50 ಓವರ್‌ಗಳಲ್ಲಿ ಭಾರತ ತಂಡ 308 ರನ್‌ಗಳಿಗೆ 8 ವಿಕೆಟ್ ಕಳೆದುಕೊಂಡು ಎದುರಾಳಿ ತಂಡಕ್ಕೆ ಶರಣಾಯಿತು.