ಕೊಹ್ಲಿ ಪಡೆಗೆ ಮುಳುವಾದ ಮಳೆ: ಆಸ್ಟ್ರೇಲಿಯಾಗೆ ರೋಚಕ ಜಯ

ಆರಂಭಿಕ ಶಿಖರ್ ಧವನ್ ಏಕಾಂಗಿ ಹೋರಾಟದ ಹೊರತಾಗಿಯೂ ಭಾರತ ತಂಡ ಡಕವರ್ತ್​ ಲೂಯಿಸ್ ನಿಯಮದಡಿ 4 ರನ್ ಗಳಿಂದ ಸೋಲುಂಡಿತು. ಈ ಮೂಲಕ ಮೂರು ಪಂದ್ಯಗಳ ಟಿ-20 ಸರಣಿಯಲ್ಲಿ ಆತಿಥೇಯ ಆಸ್ಟ್ರೇಲಿಯಾ 1-0ಯಿಂದ ಮುನ್ನಡೆ ಸಾಧಿಸಿತು.

ಬ್ರಿಸ್ಬೇನ್​ನಲ್ಲಿ ಮಂಗಳವಾರ ನಡೆದ ಮೊದಲ ಟಿ-20 ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ ತಂಡ 17 ಓವರ್ಗಳಲ್ಲಿ 4 ವಿಕೆಟ್​ಗೆ 158 ರನ್ ಗಳಿಸಿದ್ದಾಗ ಮಳೆ ಸುರಿಯಿತು. ಇದರಿಂದ ಭಾರತಕ್ಕೆ ಡಕ್​ವರ್ತ್​ ಲೂಯಿಸ್ ನಿಯಮದ ಅನ್ವಯ 17 ಓವರ್ ಗಳಲ್ಲಿ 174 ರನ್​ಗಳ ಪರಿಷ್ಕೃತ ಗುರಿ ನೀಡಲಾಯಿತು. ಭಾರತ ಓವರ್ ಪೂರ್ಣಗೊಂಡಾಗ 7 ವಿಕೆಟ್ ಕಳೆದುಕೊಂಡು 169 ರನ್ ಗಳಿಸಲಷ್ಟೇ ಶಕ್ತವಾಯಿತು.

ಭಾರತ ತಂಡ ಆರಂಭದಲ್ಲೇ ರೋಹಿತ್ ಶರ್ಮ ವಿಕೆಟ್ ಕಳೆದುಕೊಂಡರೂ ಶಿಖರ್ ಧವನ್ ಏಕಾಂಗಿಯಾಗಿ ತಂಡವನ್ನು ಮುನ್ನಡೆಸಿದರು. ಧವನ್ 42 ಎಸೆತಗಳಲ್ಲಿ 10 ಬೌಂಡರಿ ಹಾಗೂ 2 ಸಿಕ್ಸರ್ ಸೇರಿದ 72 ರನ್ ಗಳಿಸಿದರು. ಧವನ್ ಕ್ರೀಸ್​ನಲ್ಲಿ ಇರುವವರೆಗೂ ಭಾರತ ಗೆಲುವಿನತ್ತ ಸುಲಭವಾಗಿ ಮುನ್ನಡೆಯುತ್ತಿತ್ತು. ಆದರೆ ಧವನ್ ಔಟಾಗುತ್ತಿದ್ಧಂತೆ ಭಾರತ ಮತ್ತೊಮ್ಮೆ ಕುಸಿತಕ್ಕೆ ಒಳಗಾಗಿ ಸೋಲಿನ ಹಾದಿ ಹಿಡಿಯಿತು.

ಇದಕ್ಕೂ ಮುನ್ನ ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ ತಂಡ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್​​ಮನ್​ಗಳ ನೆರವಿನಿಂದ ಉತ್ತಮ ಮೊತ್ತ ಕಲೆಹಾಕಿತು.

ಗ್ಲೆನ್​ ಮ್ಯಾಕ್ಸ್​ ವೆಲ್ 24 ಎಸೆತಗಳಲ್ಲಿ 4 ಸಿಕ್ಸರ್ ಸೇರಿದ 46 ರನ್ ಬಾರಿಸಿ ತಂಡದ ಪರ ವೈಯಕ್ತಿಕ ಶ್ರೇಷ್ಠ ಸಾಧನೆ ಮಾಡಿದರು. ಮ್ಯಾಕ್ಸ್ ವೆಲ್ ಮತ್ತು ಸ್ಟೋನಿಸಿಸ್ (ಅಜೇಯ 33ರನ್, 19 ಎಸೆತ, 3 ಬೌಂಡರಿ, 1ಸಿಕ್ಸರ್) 4ನೇ ವಿಕೆಟ್​ಗೆ 82 ರನ್​ಗಳ ಜೊತೆಯಾಟ ನಿಭಾಯಿಸಿ ತಂಡವನ್ನು 150ರ ಗಡಿ ದಾಟಿಸಿದರು. ಭಾರತದ ಪರ ಕುಲದೀಪ್ ಯಾದವ್ 2 ವಿಕೆಟ್ ಪಡೆದರು.

• ಸಂಕ್ಷಿಪ್ತ ಸ್ಕೋರ್
• ಆಸ್ಟ್ರೇಲಿಯಾ 20 ಓವರ್ 4 ವಿಕೆಟ್ 158 (ಮ್ಯಾಕ್ಸ್​ವೆಲ್ 46, ಸ್ಟೊನಿಸಿಸ್ ಅಜೇಯ 33, ಕುಲದೀಪ್ 24/2).
• ಭಾರತ (ಧವನ್ 76, ಕಾರ್ತಿಕ್ 30, ರಿಷಭ್ 20, ಜಂಪಾ 22/2, ಸ್ಟೊನಿಸಿಸ್ 27/2).