ಶೀತ, ಕೆಮ್ಮಿಗೆ ರಾಮಬಾಣ ಈ ಕಷಾಯ

ಚಲಿಗಾಲ ಶುರುವಾಯ್ತು ಅಂದ್ರೆ ಶೀತ, ಕೆಮ್ಮು ಇತ್ಯಾದಿ ಸಮಸ್ಯೆಗಳು ಬರುವುದು ಸಾಮಾನ್ಯ. ಚಿಕ್ಕ-ಪುಟ್ಟ ಸಮಸ್ಯೆಗಳಿಗೂ ವೈದ್ಯರ ಬಳಿ ಹೋಗುವ ಮೊದಲು ಈ ರೀತಿಯ ಆರೋಗ್ಯಕರ ಪೇಯ ತಯಾರಿಸಿ ಕುಡಿದರೆ, ಶೀತ, ಕೆಮ್ಮಿನಿಂದ ದೂರವಿರಬಹುದು. ಈ ರೀತಿಯ ಕಷಾಯದ ಪುಡಿಯನ್ನ ಅಂಗಡಿಯಿಂದ ತರುವುದಕ್ಕಿಂತ, ಮನೆಯಲ್ಲೇ ಮಾಡುವುದು ಉತ್ತಮ.

ಕಷಾಯದ ಪುಡಿಗೆ ಬೇಕಾಗುವ ಸಾಮಗ್ರಿ: ಕೊತ್ತಂಬರಿ ಕಾಳು 1ಕಪ್, ಜೀರಿಗೆ ಅರ್ಧ ಕಪ್, 2 ಸ್ಪೂನ್ ಸೋಂಪು, 1 ಸ್ಪೂನ್ ಕಾಳುಮೆಣಸು, ಒಂದು ಏಲಕ್ಕಿ.

ಕಷಾಯ ತಯಾರಿಸುವ ವಿಧಾನ: ಮೇಲೀನ ಎಲ್ಲಾ ಸಾಮಗ್ರಿಯನ್ನು ಒಂದು ಬಾಣಲೆಗೆ ಹಾಕಿ, ಹೊಂಬಣ್ಣ ಬರುವತನಕ ಹುರಿಯಿರಿ. ನಂತರ ಇದನ್ನು ಮಿಕ್ಸಿಗೆ ಹಾಕಿ, ತರಿ ತರಿಯಾಗಿ ರುಬ್ಬಿಕೊಳ್ಳಿ. ಈ ಕಷಾಯದ ಪುಡಿಯನ್ನು ಗಾಳಿಯಾಡದ ಡಬ್ಬದಲ್ಲಿ ತುಂಬಿಡಿ.

ಪ್ರತಿದಿನ ಕಾಯಿಸಿದ ಹಾಲಿಗೆ ಇದನ್ನು ಸೇರಿಸಿ ಕುಡಿಯುವುದು ಆರೋಗ್ಯಕ್ಕೆ ಒಳ್ಳೆಯದು. ಸಿಹಿ ಇಷ್ಟವಿದ್ದಲ್ಲಿ ಇದಕ್ಕೆ ಬೆಲ್ಲ ಸೇರಿಸಿ ಕುಡಿಯಬಹುದು(ಸಕ್ಕರೆಗಿಂತ ಬೆಲ್ಲ ಆರೋಗ್ಯಕ್ಕೆ ಒಳ್ಳೆಯದು). ಶೀತವಾದ ಸಂದರ್ಭದಲ್ಲಿ ಕಷಾಯಕ್ಕೆ ಶುಂಠಿ ಹಾಕಿ ಕುದಿಸಿ ಕುಡಿಯಬಹುದು.