ಮೊದಲ ದಿನವೇ 246 ರನ್​ಗೆ ಇಂಗ್ಲೆಂಡ್ ಆಲೌಟ್​

ಸೌಥ್​ಹ್ಯಾಂಪ್ಟನ್: ಟೀಂ ಇಂಡಿಯಾದ ವೇಗಿಗಳ ದಾಳಿಗೆ ತತ್ತರಿಸಿದ ಆಂಗ್ಲರು ನಾಲ್ಕನೆ ಟೆಸ್ಟ್ ಪಂದ್ಯದ ಮೊದಲ ಇನ್ನಿಂಗ್ಸ್​ ನಲ್ಲಿ 246 ರನ್​ಗಳಿಗೆ ಆಲೌಟ್​ ಆಗಿದೆ.

ರೋಸ್​ಬೌಲ್​ ಕ್ರೀಡಾಂಗಣದಲ್ಲಿ ಆರಂಭವಾದ ಪಂದ್ಯದಲ್ಲಿ ಟಾಸ್​ ಗೆದ್ದು ಮೊದಲು ಬ್ಯಾಟ್ ಮಾಡಿದ ಇಂಗ್ಲೆಂಡ್ 246 ರನ್​ಗಳ ಸಾಧಾರಣ ಮೊತ್ತಕ್ಕೆ ಆಲೌಟಾಯಿತು. ದಿನದಾಂತ್ಯಕ್ಕೆ ಭಾರತ ವಿಕೆಟ್ ನಷ್ಟವಿಲ್ಲದೇ 19 ರನ್ ಗಳಿಸಿದೆ.

ಟೀಂ ಇಂಡಿಯಾದ ವೇಗಿ ಜಸ್​ಪ್ರಿತ್ ಬೂಮ್ರಾ ಆರಂಭಿಕ ಬ್ಯಾಟ್ಸ್ ಮನ್ ಕಿಟಾನ್​ ಜೆನ್ನಿಂಗ್ಸ್ ಮತ್ತು ಅಲಿಸ್ಟರ್ ಕುಕ್ ವಿಕೆಟ್ ಪಡೆದು ಆರಂಭಿಕ ಆಘಾತ ನೀಡಿದರು. ನಂತರ ಜೋ ರೂಟ್ 4, ಜಾನಿ ಬೈರ್​ಸ್ಟೋ 6, ಬೆನ್​ಸ್ಟೋಕ್ಸ್ 23, ಜೋಸ್​ ಬಟ್ಲರ್ 21 ಬೇಗನೆ ವಿಕಟ್ ಒಪ್ಪಿಸಿ ಹೊರ ನಡೆದರು. ಇದರಿಂದ ತಂಡ 86 ರನ್ ಆಗುವಷ್ಟರಲ್ಲಿ 6 ವಿಕೆಟ್ ಕಳೆದುಕೊಂಡು ಕಳಪೆ ಮೊತ್ತಕ್ಕೆ ಆಲೌಟಾಗುವ ಭೀತಿಗೆ ಒಳಗಾಗಿತ್ತು.

7ನೇ ವಿಕೆಟ್​ಗೆ ಜೊತೆಗೂಡಿದ ಮೊಯಿನ್ ಅಲಿ ಮತ್ತು ಸ್ಯಾಮ್ ಕರನ್ 81 ರನ್​ಗಳ ಜೊತೆಯಾಟ ನಿಭಾಯಿಸಿ ತಂಡಕ್ಕೆ ಮರು ಜೀವ ನೀಡಿದರು. ನಂತರ ಮೊಯಿನ್​ ಅಲಿ (40), ಆದಿಲ್ ರಶೀದ್ (6), ಸ್ಟುವರ್ಟ್​ ಬ್ರಾಡ್​ (17) ರನ್​ಗಳಿಸಿ ಪೆವಿಲಿಯನ್ ಸೇರಿದರು.

ಏಕಾಂಗಿ ಹೋರಾಟ ನಡೆಸಿದ ಸ್ಯಾಮ್ ಕರನ್ (78) ಅರ್ಧ ಶತಕ ಸಿಡಿಸಿ ಅಶ್ವಿನ್​ಗೆ ವಿಕೆಟ್ ಒಪ್ಪಿಸಿ ಹೊರ ನಡೆದ್ರು. ಕೊನೆಗೆ ಇಂಗ್ಲೆಂಡ್ ತಂಡ 246 ರನ್​ಗಳಿಗೆ ಪತನ ಕಂಡಿತು.

ದಿನದಾಟದ ಕೊನೆಯಲ್ಲಿ ಮೊದಲ ಇನ್ನಿಂಗ್ಸ್ ಆರಂಭಿಸಿದ ಟೀಂ ಇಂಡಿಯಾ ಯಾವುದೇ ವಿಕೆಟ್ ನಷ್ಟವಿಲ್ಲದೇ 19 ರನ್​ ಗಳಿಸಿತು. ಕೆ.ಎಲ್​. ರಾಹುಲ್ ಅಜೇಯ 11 ಮತ್ತು ಶಿಖರ್ ಧವನ್ ಅಜೇಯ 3 ರನ್​ ಗಳಿಸಿ ಎರಡನೇ ದಿನಕ್ಕೆ ಕ್ರಿಸ್​ ಕಾಯ್ದುಕೊಂಡರು.

• ಸಂಕ್ಷಿಪ್ತ ಸ್ಕೋರ್
• ಇಂಗ್ಲೆಂಡ್ ಮೊದಲ ಇನಿಂಗ್ಸ್ 76.4 ಓವರ್ 246 (ಕರನ್ 78, ಮೊಯಿನ್ ಅಲಿ 40, ಬ್ರಾಡ್ 17, ಕುಕ್ 17, ಬುಮ್ರಾ 46/3, ಇಶಾಂತ್ 26/2, ಅಶ್ವಿನ್ 40/2, ಶಮಿ 51/2).
• ಭಾರತ ಮೊದಲ ಇನಿಂಗ್ಸ್ ವಿಕೆಟ್ ನಷ್ಟವಿಲ್ಲದೇ 19 (ಧವನ್ 3, ರಾಹುಲ್ 11).