ಟೆಸ್ಟ್​ ಕ್ರಿಕೆಟ್​ನಲ್ಲಿ ಬಾಂಗ್ಲಾಗೆ ಮುಖಭಂಗ: 43 ರನ್​ಗೆ ಆಲೌಟ್​!

ಆ್ಯಂಟಿಗುವಾ: ವೆಸ್ಟ್ ಇಂಡೀಸ್​ನ ಮಧ್ಯಮ ವೇಗಿ ಕೇಮರ್ ರೋಚ್​ ಅವರ ಮಾರಕ ದಾಳಿಗೆ ತತ್ತರಿಸಿದ ಬಾಂಗ್ಲಾದೇಶ ಮೊದಲ ಟೆಸ್ಟ್ ಪಂದ್ಯದಲ್ಲಿ 43 ರನ್​ಗಳಿಗೆ ಆಲೌಟಾಗಿದೆ. ಇದು ಟೆಸ್ಟ್ ಕ್ರಿಕೆಟ್​ ಇತಿಹಾಸದಲ್ಲೇ ಬಾಂಗ್ಲಾದ ಅತೀ ಕಳಪೆ ಮೊತ್ತವಾಗಿದೆ.

ಸರ್​ ವಿವಿಯನ್ ರಿಚರ್ಡ್ಸ್​ ಕ್ರೀಡಾಂಗಣದಲ್ಲಿ ಗುರುವಾರ ಆರಂಭಗೊಂಡ ಮೊದಲ ಟೆಸ್ಟ್ ಪಂದ್ಯದ ಮೊದಲ ದಿನ ಬಾಂಗ್ಲಾದೇಶ ಮೊದಲ ಇನಿಂಗ್ಸ್​ನಲ್ಲಿ 43 ರನ್​ಗಳಿಗೆ ಆಲೌಟಾಗಿದೆ. ದಿನದಾಂತ್ಯಕ್ಕೆ ವೆಸ್ಟ್ ಇಂಡೀಸ್ 2 ವಿಕೆಟ್ ಕಳೆದುಕೊಂಡು 201 ರನ್ ಗಳಿಸಿದ್ದು, ಮೊದಲ ದಿನವೇ 158 ರನ್​ಗಳ ಬೃಹತ್ ಮುನ್ನಡೆ ಗಳಿಸಿದೆ.

ಬಾಂಗ್ಲಾದೇಶದ ಬ್ಯಾಟಿಂಗ್ ಎಷ್ಟು ಕಳಪೆಯಾಗಿತ್ತು ಅಂದರೆ ಮೊದಲ ಅವಧಿಯ ಆಟವನ್ನೂ ತಂಡ ಪೂರೈಸಲಿಲ್ಲ. ಇದು 44 ವರ್ಷಗಳ ಟೆಸ್ಟ್ ಕ್ರಿಕೆಟ್​ನ ಇತಿಹಾಸದಲ್ಲಿ ಎರಡನೇ ಅತೀ ವೇಗದ ಪತನವಾಗಿದೆ.

ವೆಸ್ಟ್ ಇಂಡೀಸ್ ಪರ ಕ್ರೇಗ್ ಬ್ರಾಥ್ ವೇಟ್ 204 ಎಸೆತಗಳಲ್ಲಿ 88 ರನ್ ಬಾರಿಸಿ ತಂಡಕ್ಕೆ ಮಹತ್ವದ ಮುನ್ನಡೆ ತಂದುಕೊಡುವಲ್ಲಿ ಮಹತ್ವದ ಪಾತ್ರ ವಹಿಸಿದರು.

ಸಂಕ್ಷಿಪ್ತ ಸ್ಕೋರ್

• ಬಾಂಗ್ಲಾದೇಶ ಮೊದಲ ಇನಿಂಗ್ಸ್ 18.4 ಓವರ್ 43 (ಲಿಟಿಯನ್ ದಾಸ್ 25, ರೋಚ್ 8/5, ಕಮಿನ್ಸ್ 11/3, ಹೋಲ್ಡರ್ 10/2).
• ವೆಸ್ಟ್ ಇಂಡೀಸ್ ಮೊದಲ ಇನಿಂಗ್ಸ್ 68 ಓವರ್ 2 ವಿಕೆಟ್​ಗೆ 201 (ಬ್ರಾಥ್​ವೇಟ್ ಅಜೇಯ 88, ಡ್ವೈನ್ ಸ್ಮಿತ್ 58, ಕೀರನ್ ಪೊವೆಲ್ 48, ಮೊಹಮದುಲ್ಲಾ 6/1).